Fréttablaðið birti frétt þess efnis þann 11. október, lesa má fréttina hér.

Það gleður okkur að vita til þess að sú "grasrótarvinna" sem hér er unninn rati inn í umræður alþingismanna. Hitt er svo annað að þessi málaflokkur á skilið alla þessa athygli og meiri til.

Davis aðferðafræðin kemur til landsins árið 2003 og hefur með mikilli vinnu tekist að ná fótfestu. Þetta hefur gerst þrátt fyrir ákveðna andstöðu frá skólakerfinu enda er það í eðli sínu íhaldssamt og á að vera það.

Sá góði árangur sem mögulegt er að ná með vandaðri vinnu og góðri ástundun foreldra og barna hefur skilað sér í jákvæðri umfjöllun um aðferðafræðina - enda værum við ekki að starfa í dag ef árangurinn væri enginn. Munurinn á einkarekinni námsráðgjöf eins og hefðbundinni sérkennslu innan skólakerfisins er sá að við VERÐUM að sýna fram á árangur.

Davis kerfið hefur því hægt og bítandi öðlast ákveðna viðurkenningu þótt ekki sé um að ræða neina fasta styrki, því er þessi umfjöllun á alþingi fagnaðarefni. Þó ber að nefna að þau námskeið sem við höfum unnið í samstarfi við Mími-símenntun og nefnast "Aftur í nám", eru myndarlega niðurgreidd af Menntamálaráðuneytinu. ASÍ og aðildarfélög riðu á vaðið fyrir nokkrum árum í fjármögnun námskeiðanna en Menntamálaráðuneytið hefur nú að mestu leyti tekið við. Við lítum á þennan mikla stuðning sem mikla viðurkenningu á aðferðafræðinni.

Auk þess má nefna að á "viku símenntunar", sem Mímir stóð fyrir nýverið var kynning á námsskrá sem Fræðslumiðstöð atvinnulífsins hefur gefið út. "Aftur í nám" námskeiðið er þar ofarlega á blaði, en Davis leiðrétting leikur þar stórt hlutverk.

Þessi námskrá er samþykkt af Menntamálaráðuneytinu og má því segja að Davis aðferðafræðin sé löngu orðin "viðurkennd" hvað þetta varðar.